கொண்டாடப்படவேண்டியவர் சாரு



சாரு நிவேதிதாவின் எழுத்துகள் மீது காட்டப்படும் வன்மம் என்பது அவரது ஆளுமை மீது காட்டப்படும் வன்மம் அல்லாமல் வேறில்லை. மரபான அமைப்புகள் மீது நம்பிக்கையும் வழிபாட்டு மனோபாவமும் கொண்ட தமிழ் எழுத்தாளர்களில் பலர் நவீனத்துவத்தின் மீது நம்பிக்கைகொண்டவர்களாகப் பாவனை செய்பவர்கள். சரியாகச் சொல்வதானால் இப்பாவனை யாளர்களுக்கு நவீனத்துவத்தின் சாராம்சவாதம் மட்டுமே உவப்பானது. ஆனால் மரபின் மீது மூர்க்கமான எதிர்ப்பைக் காட்டுவதோடு சாராம்சத்தைக் கடந்தவர் சாரு நிவேதிதா. உரிப்பொருளில் மட்டுமல்லாது வெளிப்பாட்டு முறையிலும் அதனைக் கைக்கொண்ட ஒரு முன்மாதிரி அவர்.

விருப்பமும் விலகலும்
------------------------------
சாருவின் எழுத்துகள் - அதன் தொடக்க நிலையிலிருந்தே படிகள், மீட்சி, இங்கே இன்று - என எண்பதுகளின் இதழ்களிலிருந்தே வாசிப்பிற்குரியனவாக இருந்தன. எக்ஸிஸ்டென்சியலிசமும் பேன்ஸி பனியனும் வந்த போது உடனடியாக வாசிக்கப்பட்ட புத்தகம். அப்போது அது குறித்து எழுதியதுண்டு. அதற்கு முன்பே 'முனியாண்டி' கதைகளும்கூட. புதுச்சேரி நாடகப்பள்ளிப் பணிக்காலத்தின் தொடக்க ஆண்டுகளில் அடிக்கடி சந்திக்கும் நபர்களில் ஒருவராகவே சாருவும் இருந்தார். அவரை வாசித்த அளவுக்கு எழுத நினைத்ததில்லை

மதுரையில் நடந்த நிஜநாடக இயக்க நாடகவிழாவில் அவரது “இரண்டாம் ஆட்டம்” நாடகப்பிரதி நிகழ்த்தப் பெற்ற பிறகு கொஞ்சம் விரிசல் ஏற்பட்டது. ஆனால் விலகல் இல்லை. நெல்லைக்குப் போனபின்பு சந்திப்புகள் குறைந்தன. உயிர்மை இதழ் தொடங்கப்பட்டு தொடர்ந்து எழுதும் எழுத்தாளராக அவரும் இருந்தார்; நானும் இருந்தேன். உயிர்மைப் பதிப்பகம் வெளியிடும் ஆசிரியர்களில் அவரும் நானும் இருந்தோம். அதன் வெளியீட்டு விழாக்கள் கோலகலமாக நடந்தபோது சந்தித்துக் கைகுலுக்கிக் கொள்வோம். அவரது புனைவுக்குள் அவர் இருக்கிறார் என்பது வெளிப்படை; அவரது பார்வையில் இந்திய/ தமிழ்க்குடும்ப அமைப்புகள் விவாதப்படுகின்றன; விமரிசிக்கப் படுகின்றன என்பதும் அவற்றின் அடையாளம். காலத்தை அறுத்துத் தொடர்ச்சியற்ற தன்மையை - நான் லீனியாரிட்டியை - உருவாக்குவதோடு வெவ்வேறு வெளிகளில் நடக்கச் சாத்தியம் கொண்ட நிகழ்வுகள் வழியாகவும் தொடர்ச்சியற்ற தன்மையை உருவாக்குவார். அவரது புனைவுகளைத் தொடர்ச்சியாக வாசிக்காமல் தாண்டித்தாண்டி வாசிக்கலாம். ஆனால் புனைவல்லாத கட்டுரைகளையும் பத்தி எழுத்துகளையும் அப்படி வாசித்துவிட முடியாது. உலக இலக்கியம், உலக சினிமா, உலக இசை என விரியும் அவரது கட்டுரைகள் வாசிப்பவர்களுக்குத் தரும் தகவல்களும் விவரிப்பும் வாசிப்பின்பத்தின் விரிவுகள்.

******
அரசுத்துறை நிறுவனங்களில் தனியொருவர் முடிவை எடுத்துவிட முடியாது. அப்படியெடுக்கப்பட்டு நடைமுறைப்படுத்தப்படும் முடிவுகள் கூடப் பின்னர் விவாதத்துக்கும் விமரிசனத்திற்கும் உரியதாக மாறிவிடும் வாய்ப்புகள் அங்கே உண்டு. பல்கலைக் கழகப் பணியில் துறையின் தலைவராகவும் கல்வி மையங்களின் தலைமைப்பொறுப்பிலும் இருந்த காலங்களில் சாருவைப் பல்கலைக்கழக வளாகத்திற்கு அழைக்க வேண்டும்; அவரது உரையாடலையும் உரையையும் மாணாக்கர்கள் கேட்க ஏற்பாடு செய்ய வேண்டும் என்று நினைத்ததுண்டு. தனித்துவம் கொண்ட மொழிநடை, முன் வைக்கத் தயங்கும் கருத்தியல் போன்றவற்றைத் தயங்காமல் சொல்லும் லாவகம் என எழுதுவதோடு உரையாடலும் செய்யக் கூடியவர். அதே நேரம் முன்னுக்குப் பின் முரணாகவும் மறதியாகவும் மாற்றிச் சொல்லவும் செய்வார்.
பலதரப்பு எழுத்துகளும் உயர்கல்வியில் இருக்கும் மாணாக்கர்களுக்கு அறிமுகம் ஆகவேண்டும் என்ற நிலையில் அவரை அழைக்கவேண்டுமென முன்வைத்ததும் உண்டு. அவரது பெயரை முன்மொழிந்து பேசத்தொடங்கும்போதே மறுப்பும் வந்துவிடும். மறுப்பு விவாதமாக இருக்காது. தடையாகவே இருக்கும். அதனாலேயே அவரை அழைக்க நினைத்த எண்ணம் ஈடேறியதில்லை.

அரசு நிறுவனங்களும் தனியார் அமைப்புகளும் அங்கீகரிக்காத ஆளுமைகளையும் அங்கீகரிக்கும் வாய்ப்பு விஷ்ணுபுரம் அமைப்புக்கு உண்டு. தனியொருவராக முடிவெடுத்து அறிவிப்புச் செய்துவிடும் வாய்ப்புகொண்டது விஷ்ணுபுரம் விருது. அவ்விருதைப் பெறப்போகும் சாருநிவேதிதாவுக்கு வாழ்த்துகள். வழக்கம்போலக் கோவையில் விழா நடக்கும் என்றால் சாருவைச் சந்திக்கவும் வாய்ப்புண்டு.

https://ramasamywritings.blogspot.com/2021/06/reader.html

வாசிப்புத் தூண்டலுக்கான பனுவல்( A Reader) - ஓர் உரையாடல்


https://ramasamywritings.blogspot.com/2016/01/blog-post_19.html

கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

தி.சு.நடராசனின் திறனாய்வுப் பார்வைகள் :தமிழ் அழகியல், தமிழகத்தில் வைதீக சமயம்

தமிழ் அழகியல்: மரபும் கோட்பாடும்  பேரா. தி.சு. நடராசனின் எழுத்துகளின் மீது ஒட்டுமொத்தப் பார்வையைக் கவனப்படுத்தும் நோக்கத்தோடு திட்டமிடப்பட்ட இக்கருத்தரங்கில் அவரது தமிழ் அழகியல்: மரபும் கோட்பாடும் என்ற நூலின் நோக்கத்தையும் அந்நோக்கத்தை வாசிப்பவர்களிடம் கொண்டு சேர்ப்பதற்குப் பின்பற்றியுள்ள எழுத்து முறைமையையும் தமிழ்ச் சிந்தனை மற்றும் ஆய்வுப்பரப்பில் இந்நூலின் இடம் எத்தகையது என்பதையும் முன்வைக்கிறது இந்தக் கட்டுரை. இலக்கியம் கண்டதற்கு இலக்கணம் என்றொரு சொற்றொடர் நீண்ட காலம் பயன்பாட்டில் இருக்கிறது. இலக்கணம் என்ற சொல்லோடு அழகியல், கலையியல், இலக்கியவியல் போன்ற கலைச்சொற்களையும் சேர்த்துக்கொள்ளலாம். நீண்ட இலக்கியமரபு கொண்ட தமிழ் மொழிக்கு அதன் தொடக்க நிலையிலேயே எழுதப் பெற்ற இலக்கணம் – தொல்காப்பியம் என்னும் இலக்கண நூல் வெற்று இலக்கண நூல் அல்ல; அது ஒரு இலக்கியவியல் கோட்பாட்டை – நவீனத்திறனாய்வு சொல்லாடல்களாகப் பயன்படுத்தும் அழகியல் கோட்பாட்டைப் போன்றது என்பதை விவரிக்கிறது இந்த நூல்.   
முழுவதும் படிக்க

உடல் மறுப்பு என்னும் பெரும்போக்கு

படம்
தமிழின் சித்தர் மரபுக்குள் இருக்கும் பனுவல்களை வாசித்து முடிக்கும்போது சில அடிப்படையான புரிதல்கள் நமக்குக் கிடைக்கலாம். அவர்கள் தொடர்ந்து மனித உடலின் மீதான சந்தேகங்களை எழுப்பியவர்கள். இந்த உடல் எப்படி உருவானது என்ற கேள்வியில் தொடங்கி, எப்படி இயங்குகிறது? இயங்குதலின் விருப்பங்கள் என்ன? இயங்குதலின் மூலம் அவை உருவாக்கும் விளைவுகள் என்ன? என்று தொடர்கேள்விகளை எழுப்புகின்றார்கள்.
முழுவதும் படிக்க

கற்றல் - கற்பித்தல்: மாணவ ஆசிரிய உறவுகள்

எனது கற்பித்தல் முறையை என் மாணவர்கள் அறிவார்கள். எந்தவொரு வகுப்பிலும் நான் தயாரித்துப் போகும் குறிப்புகளை முன்வைப்பதில் தொடங்குவதே இல்லை. அதை மனதில் வைத்துக் கொண்டு, அதை நோக்கி வகுப்பைத் திருப்பும் வகையில் அன்றைய ஒரு நேரடி நிகழ்வை - அல்லது செய்தித்தாள் குறிப்பை முன்வைத்து, ஒரு படத்தை அல்லது பொருளைக் காட்டி -கேள்விகள் கேட்டு, அவர்களைப் பேசவைத்து அந்தப் பேச்சின் வழியாகவே பாடப்பகுதிக்குள் வருவேன். சிவகாசி ஜெயலெட்சுமியின் பரபரப்புச் செய்திகள், நேர்காணல்கள், படங்கள் வழியாக பெண்ணியக் கவிதைகளைப் பாடம் சொன்ன ஞாபகங்கள் - நினைவுகள் இப்போதும் பசுமையாக நினைவில் இருக்கின்றன. இதில் அவர்களுக்கும் பலன் உண்டு; எனக்கும் பலன் உண்டு.
முழுவதும் படிக்க