சிலிர்ப்புகள்



சிலிர்ப்பு-4

---------------
ஞாயிற்றுக்கிழமைப்
பின்மதியத் தூக்கத்தின்
தொடர் கனவுகள்
இன்னொரு ஞாயிற்றுக்கிழமைப்
பின்மதியக் கனவில் 
தொடரும் போடுகிறது.


சிலிர்ப்பு-3
---------------
கருக்கலின் வெளியேற்றம்
கதகதப்போடு தொனதொனக்கிறது
முந்தாநாள் பின்யாமத்து 
ஈரமுத்தமும் உரசும் கூந்தலும்
கனவே ஆயினும் கடந்த காலத்தில்
வாழ முடியாதென்பதைச்
சாளர வெளிச்சம்
சொல்லிவிட்டுப் போகிறது .

சிலிர்ப்பு-2
============
கொம்புகளின் வண்ணங்கள் தரித்துப்
போடப்பட்ட துணிப்பின்னல்
கொம்புசுத்திக் கழற்றும்போது
குட்டைக்கொம்பெனச் சிரித்து
படுத்தது பூம்பூம் மாடு
மரமேறி இறங்கும் குரங்கு பறித்த
அன்னாசிப் பழப் புளிப்பில்
தவளை கவ்விய பாம்பின் தவிப்பு
உறியடியில் கிட்டாத வெற்றி.
பார்த்த இடங்கள் நினைவில் இருக்க 
ரசித்த முகங்கள் இன்னொன்றில் நழுவும்
படித்த புத்தகங்களும் பார்த்த சினிமாக்களும்
அப்படித்தான்.
நினைவில் இருந்தவை கனவில்
நினைவில் பதியாதன மனதில்

சிலிர்ப்பு -1
ஆடைகள் நீக்கலும்
துருத்திய எலும்புகளில்
தேசத்தைத் தரிசித்தலும்
ஞானத்தின் ஆரம்பம்
மோகன்தாஸ் கரம்சந்த்
தேசத்தின் அடையாளம்.
ஆடைகள் ஏற்றலும்
நிர்வாணம் நீக்கிப்
பசியைக் கொல்லுதலும்
அறிவின் தேவை.
பாபா சாகேப்பின்
தேச அடையாளம்
ஞானம் மாயை
அறிவு நடப்பு
எங்கிருந்து தொடங்கலாம்
ஞானத்தின் தேடலிலா?
அறிவின் பாதையிலா?
எமது தேசம் எந்தத் தேசம்?

கருத்துகள்

இந்த வலைப்பதிவில் உள்ள பிரபலமான இடுகைகள்

நவீனத்துவமும் பாரதியும்

நாயக்கர் காலம். இயல் . 6 சாதிகளும் சமூக அசைவியக்கங்கமும்

ப்ளு ஸ்டார் : கிரிக்கெட்டும் அரசியலும்